លោក ប៊ូ ជុំសេរី អនុរដ្ឋលេខាធិការក្រសួងអាប់រំយុវជន និង កីឡា និងជាអនុប្រធានគណៈកម្មការបច្ចេកទេស និងជាប្រធានគណៈកម្មកាមេប្រយោគ នៃពិធីបុណ្យអ៊ុំទូកមានប្រសាសន៍ឲ្យដឹងថា គិតត្រឹមពេលនេះ ចំនួនទូកដែលបាន ចុះឈ្មោះចូលរួមប្រកួតមានចំនួន១៧០ហើយ តែចំនួននេះនៅមិនទាន់ពិតប្រាកដទេ។ កាលពីឆ្នាំទៅទូកមានចំនួន១៥៧ តែឆ្នាំនេះហាក់ដូចជាកើនឡើងបន្តិច។
អ្វីដែលថ្មីសម្រាប់ពិធីបុណ្យអ៊ុំទូកឆ្នាំនេះ គឺពិធីកាត់ព្រ័ត្រនឹងត្រូវពន្យារពេល១៥នាទី ដើម្បីទុកឲ្យមេឃងងឹតបន្តិចសិន ព្រោះសម្ដេចចៅហ្វាវាំង គង់ សំអុល នឹងឲ្យគ្រប់ទូកទាំងអស់មានពិលអគ្គីសនី ហើយនៅពេលកាត់ព្រ័ត្រពិលនោះ នឹងត្រូវបើកដើម្បីឲ្យផ្ទៃទឹកទន្លេលំអដោយពន្លឺភ្លើងពិល។ ហេតុនេះហើយ ទើបពិធីកាត់ព្រ័ត្រនឹងត្រូវពន្យារពេល១៥នាទីនោះ។
ទីចេញដំណើរត្រូវបានរៀបចំជាពោង ដើម្បីកុំឲ្យមានទូកខ្លះចេញមុនទាំងបំពាន ឯទូកខ្លះចេញក្រោយធ្វើបែបនេះ ដើម្បីឲ្យអ្វីៗវាមានភាពសុក្រឹតជាងមុន។ គណៈកម្មការបច្ចេកទេសរបស់ក្រសួងអប់រំយុវជន និង កីឡាមានចំនួនជាង២០០នាក់ក្រៅពីនេះនៅមានផ្នែកសង្គ្រោះរបស់ក្រសួងសុខាភិបាល ក្រុមសង្គ្រោះលើផ្ទៃទឹករបស់បញ្ចាការដ្ឋានកងទ័ពជើងទឹក នគរបានជើងទឹក ។
ក្នុងការប្រកួតរយៈពេល៣ថ្ងៃនេះ គឺកំណត់ការចេញដំណើរនៅវេលាម៉ោង១១ថ្ងៃត្រង់។ ចំពោះចម្ងាយប្រកួតគឺ១.៧០០ម៉ែត្រ គឺពីទីចេញដំណើរមកដល់កងព័ន្ធទី១ចម្ងាយ១.០០០ម៉ែត្រ ពីកងព័ន្ធទី១ដល់កងព័ន្ធទី ២ចម្ងាយ៥០០ម៉ែត្រ និងពីកងព័ន្ធទី២ដល់ទីផ្ដាច់ព្រ័ត្រចម្ងាយ ២០០ម៉ែត្រ។
ចំពោះរបៀបចាត់ចំណាត់ថ្នាក់គឺទូកដែលឈ្នះ៣ថ្ងៃជាប់គ្នា បានចំណាត់ក្នុងផែនលេខ២ ទូកដែលឈ្នះបាន២ថ្ងៃ ផែនចំណាត់ថ្នាក់លេខ២ ទូកឈ្នះបានមួយថ្ងៃចំណាត់ថ្នាក់លេខ៣ ឯទូកដែលចាញ់៣ថ្ងៃជាប់គ្នាបានចំណាត់ថ្នាក់លេខ៤។
ចំពោះទូកគូពិសេសកាលពីឆ្នាំមុនមានចំនួន៨០ទូកតែឆ្នាំនេះ នៅមិនទាន់ដឹងនៅឡើយទេ។ ទូកគូពិសេសការចាត់ចំណាត់ថ្នាក់គឺគិតពីថិរវេលា។ ទូកគូពិសេសនេះ ចំណាត់ថ្នាក់ពីលេខ១ ដល់លេខ៣ នឹងត្រូវព្រះមហាក្សត្រជាអ្នកប្រទានរង្វាន់ជូន៕ ប្រភព៖ www.everyday.com.kh
No comments:
Post a Comment