ភ្នំពេញ៖ ជាមួយនឹងការគោរពព្រះវិញ្ញាណក្ខន្ធ ព្រះករុណា ព្រះបរមរតនកោដ្ឋ គម្រប់ខួប៥ឆ្នាំ ដែលព្រះ អង្គបានយាងចូលទិវង្គត សម្ដេចនាយករដ្ឋមន្ត្រីហ៊ុន សែន បានរម្លឹកពីព្រះរាជសកម្មភាពរបស់ព្រះអង្គក្នុងការទាមទារឯករាជ្យជាតិរបស់កម្ពុជា ពីប្រទេសបារាំង និងបានគូសបញ្ជាក់ថា បើគ្មានព្រះរាជវត្តមានរបស់ព្រះអង្គក៏គ្មានកិច្ចព្រមព្រៀងសន្តិភាពទីក្រុងប៉ារីសនោះដែរ។
ថ្លែងក្នុងពិធីជួបសំណេះសំណាលជាមួយបេក្ខជន ដែលប្រឡងជាប់សញ្ញាបត្រមធ្យមសិក្សាទុតិយភូមិនិទ្ទេសA ចំនួន ៤២៤នាក់កាលពីព្រឹកថ្ងៃទី១៤ ខែតុលា ឆ្នាំ២០១៧នៅវិមានសន្តិភាព ពោលគឺមួយថ្ងៃមុនការប្រារព្ធខួប៥ឆ្នាំ ការយាងចូលទីវង្គត របស់ព្រះបរមរតកោដ្ឋ សម្ដេចហ៊ុន សែន បានកត់សម្គាល់ថា នៅសល់តែ ប៉ុន្មានថ្ងៃទៀតប៉ុណ្ណោះ នឹងដល់ខួបលើកទី២៤ នៃកិច្ចព្រមព្រៀង ទីក្រុងប៉ារីស ថ្ងៃទី២៣ ខែតុលា។
ក្នុងន័យនេះសម្ដេចបញ្ជាក់ថា ប្រសិនបើគ្មានវត្តមានរបស់ សម្តេច នរោត្តម សីហនុ ព្រះបរមរតនកោដ្ឋទេតើកិច្ចព្រមព្រៀងប៉ារីសនេះវាកើតមានឬអត់0x017d7
សម្ដេចបន្ដថា “…ពិតណាស់ថា មកដល់ដំណាក់កាលនេះ តួអង្គពីរដែល សំខាន់ បើគ្មានវត្តមានរបស់ព្រះអង្គក៏គ្មានវត្តមាននៃកិច្ចព្រមព្រៀងទីក្រុងប៉ារីសទេ ហើយបើគ្មានវត្តមាន ហ៊ុន សែន ក៏គ្មានកិច្ចព្រមព្រៀងទីក្រុង ប៉ារីសដែរ…គេអាចបោះបង់ ការចរចាជាមួយ ខ្មែរក្រហម ជាមួយក្រុមលោកសឺន សាន បាន ប៉ុន្តែមិនអាចបោះបង់ចោលការចរចាជាមួយសម្ដេចព្រះនរោត្ដម សីហនុនិងមិនអាចបោះបង់ ចោលការចរចាជាមួយ នាយករដ្ឋមន្ត្រី ហ៊ុន សែន បានទេ…ដូច្នេះជំនួបសីហនុ ហ៊ុន សែន ថ្ងៃទី០២ ខែធ្នូឆ្នាំ១៩៨៧ គឺជាចរន្តសំខាន់បំផុត ឆ្ពោះមកកាន់ដំណាក់កាលនៃការចរចា ស្វែងរកសន្តិភាព សម្រាប់កម្ពុជា…”។
សម្ដេច បានបញ្ជាក់ទៀតថា “…ចំណុចនេះយើងត្រូវទទួលស្គាល់ថា ប្រសិន បើអវត្តមាន ទាំងពីរនាក់ តើចរន្តរបស់កម្ពុជាទៅទីណា នេះជាចំណុចដែលកម្ពុជាត្រូវសួរ…ទោះ បីជាព្រះកាយរបស់ព្រះអង្គមិននៅជាមួយកម្ពុជាទៀតក៏ដោយ ក៏ប៉ុន្តែអ្វីៗបានរក្សាទុកសម្រាប់ជាការចង ចាំតកូនតចៅជំនាន់ក្រោយ ដែលរាជរដ្ឋាភិបាលបានរក្សាទុកមួយថ្ងៃ ដើម្បីជាការចូលរួមគោរពវិញ្ញាណក្ខន្ធ របស់ព្រះអង្គ សម្រាប់ប្រជាពលរដ្ឋកម្ពុជា…”។
គួររម្លឹកថា ព្រះករុណា ព្រះបាទសម្ដេច ព្រះនរោត្ដម សីហនុ ព្រះមហាវីរក្សត្រ ព្រះវររាជបិតា ឯករាជ្យ បូរណភាព ទឹកដីនិងឯកភាពជាតិខ្មែរ ព្រះអង្គប្រសូតនៅថ្ងៃអង្គារ ១១កើត ខែកក្ដិក ឆ្នាំច ចត្វាស័ក ព ស ២៤៦៥ ត្រូវនឹង ថ្ងៃទី៣១ ខែតុលា ឆ្នាំ១៩២២។ ព្រះអង្គបានយាងចូលព្រះទិវង្គត នៅថ្ងៃច័ន្ទ ១៥រោច ខែភទ្របទ ឆ្នាំរោង ចត្វាស័ក ព ស ២៥៥៦ ត្រូវនឹងថ្ងៃទី១៥ ខែតុលា ឆ្នាំ២០១២ ក្នុងព្រះជន្មាយុ ៩០ព្រះវស្សា ដោយទទួលព្រះបរមបច្ឆា មរណនាម «ព្រះបរមរតនកោដ្ឋ»៕ ប្រភព៖ www.everyday.com.kh
No comments:
Post a Comment